Ngjarja ka ndodhur në një klasë parashkollorësh në Nidri, të ishullit të Lefkadhës, ku mësuesja për festën kombëtare greke të 28 Tetorit, kishte vendosur në klasë, përkrah flamurit grek, flamurin shqiptar dhe atë italian dhe iu kishte kërkuar fëmijëve që t’i vizatonin ata. Mësuesja tha se e kishte bërë këtë veprim në kontekstin e edukimit ndërkulturor të nxënësve, pasi në klasë kishte 8 fëmijë me kombësi jogreke.
Kaq ka mjaftuar që disa prindër të depozitojnë një ankesë me shkrim në Drejtorinë Arsimore, e cila urdhëroi një hetim administrativ për mësuesen. Prindërit gjithashtu njoftuan edhe anëtarë të Agimit të Artë, të cilët akuzuan atë për edukim antikombëtar të fëmijëve.
Mësuesja u transferua në një shkollë tjetër të ishullit në pritje të rezultatit të hetimit administrativ, por ndërhyrja e Agimit të Artë në këtë çështje, ka provokuar reagime në komunitetin arsimor të Greqisë.
Sekretari i përgjithshëm i Federatës së mësuesve, Stavros Petrakos tha se Federata e cilëson “të papranueshme dhe jo institucionale një ndërhyrje të tillë”. Ai theksoi se në një shkollë me 20 nxënës, 8 nga të cilët janë të huaj, nuk mund të reagohet ndryshe. “Ne nuk mund të injorojmë 40% të nxënësve që vijnë nga një vend tjetër. Mësuesi nuk mund t’i margjinalizojë ata. Nuk është ky roli i tij”, tha sekretari i përgjithshëm i Federatës së mësuesve
Sot, presidenti, nënkryetari dhe anëtarë të tjerë të Federatës së Mësuesve shkuan në Lefkada, në përpjekje për të ndaluar "procesin e papranueshëm të largimit të mësueses".
